(DHNC) Development of Host and Neighboring Barangays - LIVELIHOOD

Organic Rice Farming sa Sapa, gisugdan!

ORGANIC RICE FARMING. Pormal nga gisugdan ang pag-ugmad sa halapad nga basakan didto sa Brgy. Sapa, Claver, Surigao del Norte nga mukabat sa 42 ka-ektarya ang gilauman nga mahurot pagtanum sa humay gamit ang mga organikong pagbansay sa pagkultibar niini.

Septiyembre 18, 2018, gipahigayon ang ceremonial planting nga gitambungan sa mga bisita sa nagkalain-laing sektor sa komunidad. Gipangunahan kini sa Taganito HPAL Nickel Corporation isip isa sa gibanderang programa nan kompaniya sulod sa livelihood nga bahin ubos sa Social Development and Management Program.

Ang maong ceremonial planting gipartisiparan sa mga mag-uuma sa Brgy. Sapa, Opisyales sa Barangay Local Government Unit sa barangay, nga gipangunahan ni Brgy. Captain Aida Vertudazo ug iyang mga Kagawad. Gikan sa Local Government Unit of Claver nga giripresentahan ni Vice-mayor Narlito G. Jamesula, SB Members Lea Patan, Jerry Mainit, Chandy Basul, SK Federation President Dan Diegas ug mga personahe gikan sa 36IB nga usa sa kaabag nan kompaniya sa pagsugod sa niining proyekto.

(Sugod sa waya - Jeffrey Moralda (Empleyado nan THPAL), kauban si Restituto Galendez ug uban pang mga mag-uuma nga nagtanum ug similya sa humay sa Ceremonial Planting niadtong Martes, Septiyembre 18, 2018

Kun mahinumduman kining programa nan Taganito HPAL Nickel Corporation sa Organic Rice Farming gisugdan sa Brgy. Urbiztondo ug nahimo kining malampuson ug karun nagsugod na usab para sa 2^nd cycle sa pagpananum sa humay. Sa maong higayon gipaila ug gidala na  sa Brgy. Sapa isip usa ka barangay nga adunay halapad nga basakan na muhaom sa proyekto nan kompaniya ug mas mapalungktad pa ang panginabuhian sa katawhan ug agrikultura sulod niini.

“Daku gayud ang ako pagpasalamat hilabi na sa THPAL nga ilang gihatagan ug dakung pagtagad ang agrikultura, pinaagi sa organikong pamaagi sa pagpananum,” matud pa ni Vice-mayor Narlito Jamesula. Apan gidugang usab sa bise mayor nga bisan paman sa kaniadtong mga panahon nagdaku na siya sa pagpananum gamit ang organikong pamaagi nga matud pa niya pinakamarajaw gumikan walay kemikal nga magsulig an mga tanum ug walay dapat kabalakhan sa panlawas kun kini makaon sa tawo.

Usa ang Brgy. Sapa sa komunidad nga lajo sa sentro nan Claver ug usa sa panginabuhian sa mga katawhan mao ang mag-ugmad sa bukid, pagpananum ug duma ug pagbasak. Mao kini ang nakitang panginahanglan na gitugunan nan Taganito HPAL Nickel Corporation pinaagi sa organic rice farming. Ang mga mag-uuma dili na kinahanglan pa mukadto sa lain lugar para magtrabaho kundi anaa nalang sila sa ilang tugkaran ug mag-atiman sa ilang mga tanum ug adunay giya sa angay buhaton pinaagi ni Mr. Ignacio Lauzon, ang Organic Rice Farming Specialist.

“Mapasalamaton gajud ako sa tabang nan THPAL sanan sa tanan nagpalujo nan ini Organic Rice Farming na nuabot na diri sa amo. 40 anyos na ako sa pagbasak, tag-agihan ko na magtanum nan kalibre kamote ug humay ug karon mas nakakita ako nan daku na tabang pinaagi niini,” gisulti ni Restituto Galendez, 58 anyos ug lumad nga mag-uuma sa barangay Sapa.

Gilauman nga ang tibuok 42 ka-ektarya mahuman ug tanum ug mamahimong makaani sa umaabot nga bulan sa Disyembre sa kasamtangang tuig.